strong>خليل شحرور
من مواليد بلدة هونين الجنوب عام 1940 .نزح الشاعر من قريته وسكن ببلدة تدعى (شحور) بالجنوب . ترعرع وعاش بهذه البلدة الشاعرية التي يوجد فيها العديد من الشعراء ومن خلال احتكاكه بهم نضجت ميوله للشعر اللبناني وبدا منذ ذاك حياته الشعرية اول قصيدة نظمها كانت بعنوان -حزيني- شعره وجداني واحيانا اكثر من اللزوم . يملك مجموعة مطاعم الشحرور ورئيس عصبة الزجل اللبناني.
مقاطع من قصائده
وينك يا عمر الهني
وينك يا عمر الهني ويا ليل موّالي
اسمك بقلبي الحزين ورسمك قبالي
معقول انسى الشمع كيف الشمع بيدوب
لوما بليلك حياتك دايبه ليالي
معقول انسى هواك وإنت يا محبوب
عايش ببالي وما عم تروح من بالي
وكل ما خيالي مرق ع خيالك المهيوب
خلّلي خيالك يجي ليله مع خيالي
مكتوب ببعت بحسرات الدمع مكتوب
وإنت ببريد العطف ما بتبعت رسالي
نيال قلبو الما عند بهالدني محبوب
ويا ويل قلبو اللي قلبو من الهوا خالي
بجرّب بريشة نغم وبكاسة المشروب
طفّي لهيب الجمر عافرقة الغالي
برجع عاخد القلق شوف الدمع مسكوب
وأكتر ما غالي الجمر دمع الهجر غالي
بجرّب بغروب الشمس اهرب من المكتوب
وشوفك عاخدّ القمر بالميّ بتلالي
برجع بشوف العمر آخر حياتو غروب
بفزع عَ حالي لإنك ساكن بحالي
الإرشاد الرسولي
مبارح البابا زارنا بجبين
بيشبه شروق الشمس ع صنين
باسم المحبة وباسم يسوع
الاسلام بارك والمسيحيين
ومطرح ما صلّى عالبرج فينا
وزكّى التراب وقدّس المينا
بيكون قالوا له أهالينا
هيدي الأرض كانت أراضينا
واليوم لا أرض ولا ملاكين
ولمّا قبالو كلنا مرقنا
عَ البرج كتف بكتف متّحدين
احتار كيف الدين فرّقنا
واليوم جامعنا الصلا والدين
يا سيّدي الجايي بلهفة وشوق
شعبنا المعروف كلو ذوق
اللي تحت متفقين بس الفوق
يا سيّدي هني اللي مختلفين
من وقت ما قالوا استقلّينا
خواريف ع ديهن تربّينا
وكل ما استحلوا يعيّدوا علينا
بيمرقونا تحت هالسكين
ساعة باسم ميثاق مش مكتوب
وساعة باسم الطائف المصلوب
ومش عاقياس الموطن المنكوب
عاقياسن بيفصلو قوانين
يا سيّدي يا أقدس الأقداس
إرشادك وتوجيهك ع الراس
ما إنت أعرف من جميع الناس
قيامة الأوطان ما بتقوم
إلا عإيدين قدّيسين
لقراءة المزيد يرجى الضفط على الصورة او الصور
No Comments/Trackbacks for this post yet...